Erik Matti sa MMFF scandal: Akala nila lahat ng tao pag niloko tatameme lang!

AYAW magpaawat ni direk Erik Matti sa katatarang sa Twitter.

“We thought we were just doing a small film that will only appeal to a few. Thank you #MMFF2015 for the buzz you created. #HonorThyFather.”

“Akala nila lahat ng tao pag niloko tatameme lang kasi makapangyarihan silang mga haligi ng industriya. #MMFF2015Scandal.”

‘Yan ang latest na nakakalokang tweet niya. Earlier, he dropped hints in a blind item na meron ngang nangyaring sabotahe sa pelikula niyang “Honor Thy Father.” Meron daw kasing MMFF organizer na kasosyo sa isa o dalawang filmfest entries? “Tingnan ang winners. Nandiyan lang ang sagot. #MMFF 2015Scandal.#RIPMMFF,” tweet niya.

Dayaan ng ticket sa MMFF iimbestigahan din

Bukod sa kinukuwestyong diskuwalipikasyon ng Honor Thy Father, iimbestigahan din ng House committee on Metro Manila Development ang napabalitang ticket switching sa mga sinehan.

Sinabi ng chairman ng komite na si Quezon City Rep. Winston Castelo na hindi katanggap-tanggap ang pagkakaroon ng dayaan sa bilihan ng ticket upang mapataas ang ticket sales ng ibang pelikula.

Ayon sa mga lumabas na ulat, may ilang manonood ang bumili ng tiket para mapanood ang “My Bebe Love” pero binigyan umano ng ticket ng karibal na”Beauty and the Bestie”.

Sinabi ni Castelo na agad niyang ipatatawag ang pagdinig sa pagbubukas ng sesyon sa Enero upang maimbestigahan ang reklamo sa Metro Manila Film Festival.

“This is a lingering issue that has not been appropriately addressed and clarified,” ani Castelo.
Ipatatawag umano niya ang mga opisyal ng mga pelikulang sangkot gaya nina

Kung kailangan, sinabi ni Castelo na lilikha sila ng batas upang mabantayan ang mga polisiya ng MMFF para mas lalong mapalakas ang industriya ng pelikulang Pilipino.

Aldub winasak na ang record ni Vice sa MMFF; My Bebe Love kumita ng P60.5m sa opening day

WINASAK na ng tambalang Alden Richards at Maine Mendoza ang naitalang record ni Vice Ganda sa history ng Metro Manila Film Festival.

Ito’y matapos kumita ang “My Bebe Love: #KiligPaMore” ng AlDub ng humigit-kumulang P60.5 million sa unang araw pa lang ng 2015 MMFF noong Pasko

Sa report ng GMA, umabot daw sa P60,462,169.57 ang ticket sales ng nasabing MMFF entry noong Dec. 25, dahil na rin sa dami ng sinehang ibinigay sa pelikula. Sa SM Megamall pa lang ay apat na agad ang sinehan ng “My Bebe Love”.

Patunay lang ito na buung-buo pa rin ang suporta ng ALDub Nation kina Alden at Maine, pati na rin kina Vic Sotto at Ai Ai delas Alas. Tinupad nila ang kanilang pangako na gagawin nilang Box-Office King & Queen ang tinaguriang phenomenal loveteam ng taon.

Sa unang ulat na nakuha namin, umabot sa mahigit P33 million ang kinita ng AlDub movie sa Metro Manila, habang umabot naman sa P27 million ang ticket sales sa mga provincial cinema.

At dahil nga rito, ang “My Bebe Love” na ang may hawak ng titulo bilang “highest opening gross among all Filipino films of all time.” Sa ginanap na 2014 MMFF ang entry ni Vice Ganda na “The Amazing Praybeyt Benjamin” ang tinanghal na “highest opening gross among all Filipino films of all time” matapos itong kumita ng P53 million sa opening day ng MMFF.

Habang sinusulat namin ang balitang ito, nananatili pa ring number one sa labanan sa takilya ang “My Bebe Love”, at pangalawa naman ang “Beauty And The Bestie” nina Vice at Coco Martin.